बाबरी मशीद विध्वंस : सर्व आरोपी निर्दोष मुक्त
Goan Varta Live | प्रतिनिधी
लखनौ : 1992 मध्ये बाबरी मशीद (Babari Masjid) पाडल्याच्या प्रकरणी सर्व आरोपींची निर्दोष मुक्तता करण्यात आली. लखनौच्या विशेष सीबीआय न्यायालयाने हा निकाल दिला.
या प्रकरणात भाजप नेते लालकृष्ण अडवाणी (Lal Krishn Adwani) आणि मुरली मनोहर जोशी (Murali Manohar Joshi) आरोपी होते. आरोपींमध्ये उमा भारती (Uma Bharati), उत्तर प्रदेशचे माजी मुख्यमंत्री कल्याण सिंह (Kalyan Sing), विनय कटियार, साध्वी ऋतंभरा यांचाही समावेश आहे. या प्रकरणाचा तपास करणाऱ्या सीबीआयने न्यायालयापुढे 351 साक्षीदार आणि सुमारे 600 कागदपत्रे पुरावा म्हणून सादर केली होती. 48 जणांविरोधात आरोप निश्चित केले होते. मात्र त्यापैकी 16 जण खटला सुरु असताना मरण पावले.
लालकृष्ण अडवाणी यांनी व्हिडीओ कॉन्फरन्सिंगच्या माध्यमातून विशेष सीबीआय कोर्टात आपला जबाब नोंदवला होता. यावेळी त्यांना न्यायाधीशांकडून 100 प्रश्न विचारण्यात आले होते. त्याच्या एक दिवस आधी मुरली मनोहर जोशी यांचा जबाब नोंदवण्यात आला होता. दोघांनीही आपल्यावरील आरोप फेटाळले होते.
बाबरी विध्वंस ही घटना पूर्वनियोजित नव्हती, ती एक उत्स्फूर्त प्रतिक्रिया होती, असं कोर्टाने नमूद केलं.
निकाल सुनावला जात असताना लालकृष्ण अडवाणी, मुरली मनोहर जोशी, उमा भारती, कल्याण सिंह, सतीश प्रधान आणि महंत नृत्यगोपाल दास यांच्याव्यतिरिक्त सर्वजण उपस्थित होते. अडवाणी आणि मुरली मनोहर जोशी यांना प्रकृतीच्या कारणास्तव गैरहजर राहण्याची मुभा देण्यात आली. तर उमा भारती यांना करोनाची लागण झाली असून, कल्याण सिंह सध्या उपचार घेत आहेत. एकूण २६ आरोपी कोर्टात हजर होते. यामध्ये साध्वी ऋतंभरा, चंपत राय, विनय कटियार, ब्रिजमोहन शरण सिंग आणि इतर जणांचा समावेश होता.
