मोठी बातमी! राज्यात आजारसंहिता लागू, 20 मार्चला पालिका निवडणुका

निवडणूक आयोगाची माहिती

विश्वनाथ नेने | प्रतिनिधी

पणजी : झेडपीनंतर होऊ घातलेल्या पालिका निवडणुकांची तारीख अखेर निश्चित करण्यात आली आहे. येत्या 20 मार्चला पालिका निवडणुका पार पडणार आहेत. तर 22 मार्चला पालिका निवडणुकांसाठीची मतमोजणी पार पडेल. निवडणूक आयोगानं याबाबतची माहिती दिली आहे.

महत्त्वाच्या तारखा

पालिका निवडणुकांसाठी नेमक्या अर्ज भरण्याच्या आणि मागे घेण्याच्या तारखांबाबतही माहिती देण्यात आली आहे. 25 फेब्रुवारीपासून इच्छुक उमेदवारांना आपले अर्ज भरता येणार आहे. 4 मार्चपर्यंत अर्ज भरण्याची मुदत देण्यात आलेली आहे. तर 5 मार्चपर्यंत अर्जांची छाननी केली जाणार आहे. दरम्यान, 6 मार्च ही अर्ज मागे घेण्याची अंतिम मुदत असणार आहे. त्यामुळे या तारखांमध्येच इच्छुक उमेदवारांना अर्ज भरून पालिका निवडणुकांच्या रिंगणात उतरता येऊ शकेल.

आचारसंहिता लागू

दरम्यान, राज्यात आचारसंहिता लागू करण्यात आली आहे. आता येऊ घातलेल्या निवडणुकांच्या पार्श्वभूमी कोण मिरवतं आणि कोण जिरवतं, ये 22 मार्चला स्पष्ट होणार आहे. पण तोपर्यंत राज्यात राजकीय वातावरण तापणार हे तर नक्की. दरम्यान, पालिका निवडणुकांसाठीचं आरक्षण याआधीच जाहीर करण्यात आलं आहे. त्यानुसार 20 मार्चला पालिका निवडणुकांसाठीचं मतदान पार पडणार आहे.

11 नगरपालिका आणि पणजी महापालिकेची निवडणूक 20 मार्च रोजी. 22 मार्च रोजी मतमोजणी. उमेदवारी अर्ज 25 फेब्रुवारी ते 4 मार्च पर्यंत भरण्याची मुदत. आजपासून आचारसंहिता.पेडणे, म्हापसा, डिचोली, वाळपई, मडगांव, कुंकळ्ळी, मुरगांव, सांगे, केपे, कुडचडे-काकोडा आणि काणकोण नगरपालिकेसाठी होईल निवडणूक.

हेही वाचा – ‘आचारसंहिता’ म्हणजे नेमकं काय रे बाब?

दरम्यान, येतं वर्ष हे विधानसभा निवडणुकांचं वर्ष आहे. त्या पार्श्वभूमीवर झेडपी निवडणुकीत भाजपनं आधीच स्पष्टपणे बाजी मारत विरोधकांना धूळ चारली होती. आता विधानसभा निवडणुकांआधी होणाऱ्या पालिका निवडणुकांतही भाजप माजी मारतं, की विरोधक वरचढ ठरतात, याकडे संपूर्ण राज्याचं लक्ष लागलंय. पण आचारसंहिता लागू झाल्यामुळे अनेक बंधनं ही राजकीय पक्ष आणि नेत्यांवर येणार आहेत.

हेही वाचा – पणजी महापालिकेसाठी भाजप पॅनेलचे उमेदवार जाहीर, कुणाला संधी? कुणाला डावललं?

‘आचारसंहिता’ म्हणजे नेमकं काय?

डॉ. बाबासाहेब आंबेडकरांनी लिहिलेली आचारसंहिता 1950 या वर्षी अंमलात आल्यानंतर आदर्श निवडणूक आचारसंहितेचाही स्वीकार करण्यात आला. यामध्ये निवडणुका जाहीर झाल्यानंतर राजकीय पक्ष आणि त्यांच्या उमेदवारांनी काय करावं आणि काय करू नये, असे नियम त्यांना घालून देण्यात आले. हे Do’s And Dont’s म्हणजेच निवडणूक ‘आचारसंहिता’ होय.

निवडणूक कधी घ्यायची याची तारीख ठरवण्याचे पूर्ण हक्क निवडणूक आयोगाकडे असतात. साधारणतः मतदानाच्या तारखेच्या 21 दिवस आगोदर आचारसंहिता लागू होते. तसंच निवडणूकीची घोषणा होताच आचारसंहिता लागूही करण्यात येते.

हेही वाचा – घराणेशाहीची सुरुवात? पणजीचे डॅशिंग आमदार पालिकेसाठी मुलाला देणार उमेदवारी

एकदा आचारसंहिता लागू झाल्यानंतर निवडणूक आयोगाला उमेदवार याचं पालन करतात की नाही याकडे लक्ष देण्याचा संपूर्ण अधिकार असतो. तसंच उमेदवार चुकीचं वर्तन करत असल्यास अथवा नियम मोडत असल्यास संबंधित उमेदवाराला निवडणूकीतून बेदखल करण्याचाही हक्क आयोगाकडे आहे. त्यामुळं प्रत्येक पक्ष या प्रचार काळात आपल्या सूचनांचं पालन करत असतो आणि ते त्याला बंधनकारकही आहे.

पक्षानं आपल्या प्रचारात असं कोणतंही भाषण, प्रचार सामग्री, घोषणा अथवा आश्वासनं देऊ नयेत ज्यामुळं समाजातील जाती, धर्म, वंश, बोलीभाषा इत्यादींमध्ये फुट पडेल, त्यांच्यात वाद निर्माण होतील. या काळात कोणत्याही पक्षाला त्याच्या प्रतिपक्षावर, त्यांच्या कामगिरीवर, कामांवर टीका करण्याचा अधिकार आहे, मात्र त्यांच्या खासगी आयुष्याबद्दल, त्यांच्या धर्माबद्दल, जातीबद्दल बोलता येणार नाही. तसंच त्यांची व्यक्तीगत बदनामी ही करता येणार नाही, असं केल्यास त्यास आचारसंहितेचा भंग समजण्यात येतो.

निवडणूकीच्या प्रचारात भ्रष्टाचाराला काडीमात्र स्थान नसतं. मतांसाठी लोकांमध्ये पैसे वाटणं, महागड्या वस्तू देणं, मतदारांना अमिष दाखवणं, लालूच दाखवणं अशा बाबींना आचारसंहितेमध्ये गैरप्रकार म्हटलं आहे. या गोष्टी प्रत्येक उमेदवारानं आणि पक्षानं लक्षात ठेवायला हव्यात.

या काळात जरी प्रचार करता येत असेल तरीही आचारसंहितेमध्ये नागरिकांबद्दलही विचार करण्यात आला आहे. त्यामुळं कोणताही प्रचार रात्री 10 च्या आतच संपवणं, थांबवणं बंधनकारक आहे. तसंच नागरिकांच्या खासगी इमारतीचा, मालमत्तेचा अथवा जमिनीचा वापर परवानगीशिवाय कोणत्याही पक्षाला करता येत नाही. तसंच कोणत्याही पक्षाला त्याच्या प्रतिस्पर्धी पक्षाच्या प्रचार सभांमध्ये, मिरवणूकांमध्ये, भाषणांमध्ये कसल्याच प्रकारचा अडथळा आणण्याचा अधिकार नाही, असं केल्यास त्या उमेदवाराची उमेदवारी रद्द करण्याचा अधिकार निवडणूक आयोगाकडे आहे.

कोणत्याही पक्षाला, उमेदवाराला परवानगीशिवाय प्रचार, भाषण करता येणार नाही. याकरिता उमेदवारानं आपल्या सभांसाठी प्रशासनाचं स्वीकृतीपत्र मिळवणं आवश्यक आहे. तसंच कार्यक्रमाच्या, मिरवणूकीच्या अथवा सभेच्या काही दिवस आधी प्रचारकार्य, कार्यक्रमाची वेळ, स्थळ यांची माहिती संबंधीत पोलीस ठाण्यात देणं आवश्यक आहे. जर ह्या गोष्टी केल्या नसतील तर संबंधीत सभा रद्द करण्याचा अथवा बंद करण्याचे अधिकार पोलिसांना तसंच निवडणूक आयोगाला आहेत.

आचारसंहितेच्या काळात कोणत्याही पक्षाला अथवा सरकारला आर्थिक लाभाच्या, मनोरंजनात्मक योजनांची घोषणा करता येत नाही. तसंच या योजनांची अमंलबजावणीही आचारसंहितेच्या काळात बंद ठेवावी लागते. आचारसंहितेच्या काळात कोणत्याही पक्षाला सरकारी वाहने, विमाने, हेलिकॉप्टर इत्यादी वाहनांचा निवडणूकीच्या प्रचारासाठी वापर करता येत नाही. तसंच सरकारी मालमत्ता, डाक बंगला, सरकारी गेस्ट हाऊस इथं स्वतःचा हक्क चालवता येत नाही. असं केल्यास याला आचारसंहितेचा भंग मानण्यात येतो.

आचारसंहिता केवळ निवडणूकीत उभे राहणार्याय उमेदवारांपुरतीच मर्यादीत नसून ही आचारसंहिता मंत्र्यांवरही लागू असते. त्यामुळंच या काळात कोणत्याही मंत्र्यास रस्ता, पाणी, वीज इत्यादी लोकोपयोगी विकासात्मक कामांची आश्वासनं देता येत नाहीत. तसंच निवडणूकीवर प्रभाव टाकणार्या कोणत्याही अधिकार्या्ची बदली आपल्या आवडीच्या ठिकाणी करता येत नाही. यापैकी कोणतंही काम केल्यास ते थांबवण्याचा संपूर्ण हक्क निवडणूक आयोगाला असतो.

ताज्या घडामोडी, अपडेट्स आणि तुमच्याशी निगडीत प्रत्येक गोष्ट मिळवा एका क्लिकवर! फेसबुक आणि ट्विटरवर आम्हाला फॉलो करा तसेच युट्युब, व्हाटसअप आणि टेलिग्रामवर सबस्क्राईब करायला विसरु नका.
error: Content is protected !!