पंतप्रधान मोदींवर टीका ; ६२ वर्षीय व्यक्तीला उत्तर प्रदेश पोलिसांनी अटक

Goan Varta Live | प्रतिनिधी

पणजी : पंतप्रधान नरेंद्र मोदींवर टीका केल्याने चेन्नईतील एका ६२ वर्षीय व्यक्तीला उत्तर प्रदेश पोलिसांनी अटक केली आहे. अटक करण्यात आलेला मनमोहन मिश्रा नावाचा व्यक्ती मुळचा उत्तर प्रदेशमधील असून तो ३५ वर्षांपूर्वी आपल्या कुटुंबासह चेन्नईतील माधवराम येथे स्थायिक झाला होता.

मनमोहन मिश्रा हा पॅन कार्ड आणि आधार कार्ड काढून देण्यासाठी एजंट म्हणून काम करतो. तो सोशल मीडियावर खूप सक्रिय असून अनेकदा युट्यूब आणि इतर सोशल मीडिया प्लॅटफॉर्मवर भाजपच्या नेतृत्वाखालील केंद्र सरकार आणि पंतप्रधान नरेंद्र मोदी यांच्यावर टीका करणारे व्हिडिओ पोस्ट करतो, अशी माहिती पोलिसांनी दिली.

व्हिडिओत तो हिंदी बोलत असल्याने त्याचे व्हिडिओ उत्तर प्रदेशमध्ये मोठ्या प्रमाणात व्हायरल झाले आहेत. तसेच तो स्वतःही त्याच्या सरकारविरोधी भूमिकेमुळे आणि बोलण्यामुळे लोकप्रिय झाला आहे. दरम्यान, उत्तर प्रदेशमधील काही जणांनी त्याच्या व्हिडिओवर आक्षेप घेत स्थानिक पोलीस स्टेशनला तक्रार दिली होती. कोतवाली पोलिसांनी मनमोहनविरोधात गुन्हा दाखल करून त्याचा शोध सुरू केला असता तो चेन्नईतील माधवराममध्ये राहत असल्याची माहिती मिळाली. त्यानंतर शुक्रवारी संध्याकाळी युपी पोलिसांचे एक पथक चेन्नईत पोहोचले आणि त्याला अटक केली. त्याला दंडाधिकाऱ्यांसमोर हजर करण्यात आले असून त्याच्याविरोधात ट्रांझिट वॉरंट काढण्यात आले. वैद्यकीय तपासणीनंतर त्याला रेल्वेने उत्तर प्रदेशला नेण्यात आले आहे.

दरम्यान, त्याचे नुकतेच आलेले व्हिडिओ सोशल मीडियावर उपलब्ध नाहीत. पण सहा महिन्यांपूर्वीच्या एका जुन्या व्हिडिओत तो मोदींवर टीका करताना दिसतोय. कोरोना महामारीमुळे लावण्यात आलेल्या लॉकडाऊनमध्ये मोदींनी देशातील जनतेसाठी पुरेसं काम केलेलं नाही, त्यामुळे त्यांनी पंतप्रधान पदाचा राजीनामा द्यावा, अशी मागणी त्याने या व्हिडिओत केली आहे.

ताज्या घडामोडी, अपडेट्स आणि तुमच्याशी निगडीत प्रत्येक गोष्ट मिळवा एका क्लिकवर! फेसबुक आणि ट्विटरवर आम्हाला फॉलो करा तसेच युट्युब, व्हाटसअप आणि टेलिग्रामवर सबस्क्राईब करायला विसरु नका.
error: Content is protected !!