आपनं भाजपला दातांत पकडलं, याही घोटाळ्याची चौकशी कराच…
सिद्धार्थ कांबळे | प्रतिनिधी
पणजीः आम आदमी पक्षानं भाजप सरकारच्या नाकी नऊ आणले असून, आणखी एका घोटाळ्याची सखोल चौकशीची मागणी केलीय. दंत महाविद्यालयात (डेंटल कॉलेज ) भरती प्रक्रियेदरम्यान घोटाळा झाल्याचं उघड झाल्यानं आपनं सरकारला पुन्हा एकदा धारेवर धरलंय. आरोग्यमंत्र्यांनी राजीनामा द्यावा, अशी मागणी आपचे निमंत्रक व नेते राहुल म्हांबरे यांनी केलीय.
मुलाखती घेतल्या, निकाल मात्र नाही
यात नियमित पद्धतीवर काम करण्यासाठी 37 नर्सेसच्या भरतीसाठी प्रक्रिया सुरू करण्यात आली होत. परंतु, मुलाखती व परीक्षा घेऊनही त्यांचे निकाल जाहीर करण्यात आले नाहीत. तत्पूर्वीच 37 नर्सेस कामावर रुजू झाल्यानं त्यांची नियुक्त कोणी केलीय, असा प्रश्न उपस्थित केला जातोय. आरोग्यमंत्र्यांनी आपल्या तसंच कॅबिनेटमधील सहकारी मंत्र्यांच्या मर्जीतील उमेदवारांना नियुक्ती पत्रं दिल्याचा आपचा आरोप आहेय. यातील बहुतांश नर्सेस सत्तरीतील असल्याचा दावा आपनं केलाय.
राहुल म्हांबरेंचे सरकारला सवाल
- –निकाल जाहीर होण्यापूर्वी नियुक्तीपत्रे कशी जारी केली जाऊ शकतात?
- -केवळ सत्तरी तालुक्यातील उमेदवारांनाच पहिली पसंती कशी दिली जाऊ शकते?
- -बहुतेक उमेदवार या सत्तरी तालुक्यातीलच का आहेत?
- -उमेदवारांना रांगांमध्ये उभे करून आणि परीक्षा देण्याचा उपद्व्याप व उठाठेव कशासाठी?
- -एवढे मोठे नाटक कशासाठी करण्याची गरज होती?
आणखीही घोटाळे
गोमेकॉतील बीएससी नर्सिंगसाठीच्या जागा भरताना कंत्राटी पद्धतीवर आधीच काम करणाऱ्या उमेदवारांकडे परस्पर दुर्लक्ष करण्यात आलं. त्यांना नोकरीत कायम करण्याविषयी काहीच विचार करण्यात आलेला नाहीये. नर्स पदावर काम करणाऱ्या या महिला उमेदवार गेल्या 10 वर्षांपेक्षा अधिक काळापासून कंत्राटी पद्धतीवर सेवेत कार्यरत आहेत.
मुलाखती आणि परीक्षा नर्सेसच्या निवडीसाठी घेण्यात आल्या तरी निकाल जाहीर करण्यात आले नाहीत. तरीही 37 नर्सेस डेंटल कॉलेजमध्ये नियुक्त करण्यात आल्या आहेत ज्यांची निवड प्रक्रिया हे एक रहस्य अथवा गूढ आहे.
–राहुल म्हांबरे, आपचे निमंत्रक
