AUTO & MOTO VARTA : आज 1 जून पासून सर्व कंपन्यांच्या इलेक्ट्रिक स्कूटर महागणार! इत्यंभूत माहिती येथे जाणून घ्या
Goan Varta Live | प्रतिनिधी
गोवन वार्ता लाईव्ह वेबडेस्क : देशातील स्वस्त इलेक्ट्रिक स्कूटर्सचे युग आणि तुमचे ते खरेदी करण्याचे स्वप्न एव्हाना भारत सरकारच्या या निर्णयाने संपल्यात जमा आहे. तुम्हीही पेट्रोल स्कूटर सारख्याच किमतीत इलेक्ट्रिक (EV) स्कूटर किंवा बाईक घेण्याचा विचार करत असाल, तर विसरून जा कारण आज १ जूनपासून भारतात विकल्या जाणार्‍या सर्व इलेक्ट्रिक स्कूटर महाग होणार आहेत. कारण 1 जून रोजी किंवा त्यानंतर नोंदणी केलेल्या इलेक्ट्रिक दुचाकींना केंद्र सरकारकडून दिले जाणारे अनुदान (FAME 2) कमी करण्यात आले आहे. त्यामुळे कंपन्या ग्राहकांना पूर्वीइतका फायदा देऊ शकणार नाहीत.
काय प्रकरण आहे?
गेल्या आठवड्यात, भारत सरकारच्या अवजड उद्योग मंत्रालयाने एक नवीन अधिसूचना जारी केली आहे. या अंतर्गत, मंत्रालयाद्वारे समर्थित FAME-II (फास्टर अॅडॉप्शन ऑफ मॅन्युफॅक्चरिंग इलेक्ट्रिक अँड हायब्रिड व्हेइकल्स इन इंडिया) योजनेअंतर्गत आज 1 जूनपासून इलेक्ट्रिक स्कूटरसाठी सबसिडी कमी केली जात आहे. याचा अर्थ असा की एकदा बदल अंमलात आल्यानंतर, दुचाकी ईव्हीसाठी कमाल अनुदान वाहनाच्या सध्याच्या 40% वरून 15% पर्यंत खाली येईल. दुसरीकडे, सध्याच्या 15,000 रुपयांऐवजी EV च्या बॅटरी क्षमतेसाठी 10,000 रुपये प्रति किलोवॉट सबसिडी असेल. सध्याच्या नियमानुसार, ही सबसिडी ईव्ही बनविण्यावर प्रति वाहन 60,000 रुपयांपर्यंत बसते. मात्र आता ते प्रति वाहन 22,500 रुपये करण्यात येणार आहे.
FAME-II म्हणजे काय?
ही योजना 1 एप्रिल 2019 रोजी 3 वर्षांच्या कालावधीसाठी लागू झाली आणि आता ती आणखी 2 वर्षांसाठी 31 मार्च 2024 पर्यंत वाढवण्यात आली आहे. फेज 2 अंतर्गत, ईव्ही खरेदीदारांना प्रोत्साहन देण्यासाठी एकूण परिव्यय ₹10,000 कोटी आहे.
ओलाच्या इलेक्ट्रिक स्कूटर 15,000 रुपयांनी महागल्या
ईव्ही निर्मात्या ओला इलेक्ट्रिकने भारतीय बाजारपेठेत त्यांच्या S1 श्रेणीच्या किमती वाढवल्या आहेत. Ola कडे सध्या Ola S1, S1 Pro आणि S1 Air या तीन इलेक्ट्रिक स्कूटर आहेत. Ola Electric ने Ola S1 ची किंमत 1,14,999 रुपयांवरून 1,29,999 रुपयांपर्यंत वाढवली आहे. त्याच वेळी, S1 Air आता 84,999 रुपयांवरून 99,999 रुपयांवर पोहोचला आहे. लाइनअपचे सर्वात प्रीमियम मॉडेल, S1 Pro ची किंमत 1,24,999 ते 1,39,999 रुपये आहे. सुधारित फेम-II सबसिडीसह सर्व किंमती एक्स-शोरूम आहेत.
अथरनेही भाव वाढवले
Ather Energy ने अलीकडेच त्यांच्या 450X इलेक्ट्रिक स्कूटरसाठी 32,500 रुपयांची किंमत वाढवण्याची घोषणा केली आहे. वाढलेली किंमत आज १ जूनपासून लागू होणार आहे. इतर कोणत्याही इलेक्ट्रिक टू-व्हीलर उत्पादकाने आत्तापर्यंत किमतीत वाढ जाहीर केलेली नाही, परंतु सबसिडीचा परिणाम सर्वांवर होणार असल्याने, लवकरच घोषणांची उधळण अपेक्षित आहे.
